CEL

• 

A Confederación Empresarial da Provincia de Lugo (CEL) e ABANCA veñen de renovar un convenio de colaboración co foco posto no acceso ao crédito dos empresarios e na tramitación dos fondos Next Generation para o desenvolvemento de proxectos. O acordo supón un claro apoio do banco ao mantemento e crecemento do tecido empresarial na provincia de Lugo.

O texto foi rubricado esta tarde en Lugo por parte do director territorial de ABANCA en Lugo, Javier Soto, e polo secretario xeral da Confederación Empresarial da Provincia de Lugo, Jaime Luis López. Ao acto tamén asistiu o director de zona-negocio institucional de ABANCA, José Antonio Maira.

Durante o encontro, os representantes de ABANCA trasladaron o seu apoio e compromiso ao sector empresarial da provincia, especialmente mediante a xestión de axudas europeas e canalización de proxectos que poden optar aos fondos de recuperación Next Generation, tal e como figura no acordo. Así mesmo, aseguraron o apoio do banco para desenvolver actuacións relacionadas co fomento do emprendemento e co fortalecemento de ecosistemas locais de emprendedores, poñendo o foco na creación de novas iniciativas empresariais e na detección de emprendemento con talento entre os máis novos.

Respostas ás necesidades diarias

No documento recóllese un plan de financiamento para responder de forma íntegra ás necesidades das empresas asociadas, pero tamén unha serie de produtos e servizos que fan posible tanto acometer investimentos, como reforzar a competitividade dos negocios. Desta forma, os empresarios da provincia contarán con produtos deseñados de xeito específico, como préstamos persoais, leasing mobiliario, con amplos prazos de amortización, posibilidade de carencias e xuros moi competitivos.

Para dar resposta ás necesidades do día a día, o convenio detalla solucións para as necesidades máis inmediatas do colectivo. Os empresarios adheridos terán produtos e servizos á súa disposición, como pólizas de crédito, liñas de desconto comercial, avais, confirming ou factoring. No texto tamén se fai especial fincapé no financiamento oficial dos programas do ICO e as SGR galegas.

A entidade financeira pon a disposición dos asociados a banca electrónica, o Broker Online, ABANCA Pay e o servizo Appúntame. Con este último é posible xestionar de forma fácil calquera tipo de cotas, domiciliacións ou subscricións, para eles e para os seus clientes. ABANCA tamén ofrece aos empresarios os sistemas TPV físicos e virtuais, estes últimos de especial relevancia nos últimos tempos e imprescindibles para os seus negocios en internet.