CEL

• 

Javier Bueno, profesor titular da Universidade de Santiago de Compostela (USC) incorpórase ao Comité de Expertos da recentemente constituída Fundación Agroalimentaria de Galicia (FAGA), sumándose así a Álvaro Rodríguez Eiras, o que fose un dos impulsores e primeiro presidente da Confederación de Empresarios de Lugo (CEL) e da Confederación de Empresarios de Galicia (CEG), que preside este Comité, e José Mouriño, Enxeñeiro Técnico Agrícola que participou de forma directa ou indirecta en case todas as denominacións de orixe de Galicia. 

Javier Bo, ademais de acumular unha longa traxectoria no ámbito educativo como profesor durante anos na USC e outros centros, exerceu diversos cargos nesta entidade académica, como vicerreitor adxunto de Oferta e Xestión Académicas ou vicerreitor de Coordinación do Campus de Lugo e foi director xeneral durante máis de dous anos do Centro Tecnolóxico Agroalimentario de Lugo (CETAL). 

Esta experiencia é a que se valorou desde FAGA para solicitar a súa incorporación ao Comité de Expertos, que espera poder empezar a traballar achegando os seus coñecementos á nova Fundación cunha primeira reunión despois do verán.

FAGA

A Fundación Agrolimentaria de Galicia, que preside Carlos Cebrián Escobar, ten como fin xeral o de “agrupar a diferentes organizacións empresariais, empresarios individuais, entidades mercantís empresariais e distintas entidades da Comunidade Autónoma Galega co obxecto de fomentar e promover o sector agroalimentario galego co seguinte desenvolvemento e potenciación do medio rural en Galicia”. Con maior concreción, a Fundación Agroalimentaria Galega buscará que as empresas do sector agroalimentario poidan terminar ciclos produtivos en Galicia e incrementar o valor do PIB comunitario.