Escrito o:
CEL e Ibermutua firman un acordo para colaborar no apoio ás empresas lucenses
A Confederación de Empresarios de Lugo (CEL) e Ibermutua subscribiron hoxe un acordo de colaboración para mellorar os servizos de asesoramento e información da CEL ás súas empresas, mediante a divulgación das novidades normativas en materia laboral e de Seguridade Social, con especial atención a prestacións xestionadas por Ibermutua, no marco das súas competencias como Mutua Colaboradora coa Seguridade Social.
A través do acordo búscase dar forma a unha colaboración mediante o establecemento de canles de información estables entre ambas as entidades que permitan o intercambio de coñecemento entre profesionais e das publicacións especializadas que elaboran.
O convenio tamén contempla a posibilidade de organizar accións divulgativas como xornadas de actualización e posta ao día de coñecementos en materia de xestión de Seguridade Social relacionada coas coberturas que efectúa a Mutua, dirixidas aos asociados protexidos por Ibermutua galega do ámbito de actuación da CEL.
O acto de firma tivo lugar na sede central da CEL coa presenza da directora do centro en Lugo de Ibermutua galega, Ana Belén Buendía, e o secretario xeral da CEL, Jaime López.
Consello Asesor
Á marxe do acordo, Ibermutua galega incorpórase ao consello asesor da CEL, que aglutina a empresas cunha especial traxectoria e implantación na provincia. Na actualidade e coa incorporación de Ibermutua galega, son xa trinta e cinco as empresas que o conforman, representantes de todos os sectores de actividade con forte peso na provincia (alimentación, pesca, transporte, enerxía, distribución ou banca e servizos, entre outros).
Sobre Ibermutua
Ibermutua é unha entidade colaboradora coa Seguridade Social que na actualidade conta con preto de 120 centros propios distribuídos por toda a xeografía española. A Mutua protexe a máis de 1,6 millóns de traballadores e dá cobertura a máis de 171.000 empresas.
Na Comunidade Autónoma de Galicia, onde opera baixo o nome de Ibermutua galega, conta para iso coa rede de centros e servizos máis ampla e mellor dotada do sector, con preto de vinte centros asistenciais e administrativos nesta Comunidade.