Escrito o:
Presentación do I Curso Superior de Administradores Concursais
A Escola de Empresarios da CEL acolleu hoxe a presentación do I Curso Superior de Administradores Concursais e Mediación Concursal, unha iniciativa de formación pioneira que organiza o Centro Universitario Villanueva (adscrito á Universidade Complutense de Madrid) e a Escola Sapientia en diferentes cidades españolas, sendo Madrid e Lugo pioneiras en acoller este tipo de formación.
En Lugo colaboran na posta en marcha do curso os colexios oficiais de Economistas, Avogados e Procuradores, ademais da Confederación de Empresarios de Lugo.
Para dar a coñecer este curso superior, a Escola de Empresarios da CEL, onde se impartirá a materia entre xaneiro e maio de 2014, acolleu hoxe un acto de presentación no que participaron o director de Escola Sapientia, Pedro Martín, os decanos dos colexios oficiais de Economistas (Salustiano Veo), Avogados (Félix Mondelo) e Procuradores (José Anxo Pardo) de Lugo, e a secretaria xeral adxunta da CEL, Lourdes Pardo. Cabe destacar que se trata do único punto de España no que participan estes colectivos.
Obxectivo
Esta acción formativa ten como obxectivo principal dotar aos seus alumnos dun perfil multidisciplinar como Administradores Concursais, facilitando que se convertan, a través do programa formativo deseñado, en capaces de manexar a materia concursal con destreza e experiencia e expertos na materia capacitados para desenvolver esta actividade en calquera despacho concursal.
Con este obxectivo, o programa do Curso Superior de Administradores Concursais é de carácter eminentemente práctico e estará impartido por Maxistrados e Xuíces do Mercantil, así como Secretarios Xudiciais de diferentes puntos do territorio nacional. Desenvolverase en sesións de cinco horas de duración, que terán lugar os xoves en horario de 16:00 a 21:00 horas. No seu temario abordaranse cuestións como Refinanciamento, Administración Concursal, Fases do Concurso, Mediación Concursal, etc.
O curso está preferentemente dirixido a Licenciados en Económicas ou Empresariais e Dereito. As prazas son limitadas e cubriranse por rigorosa orde de inscrición.
Os interesados en asistir poden obter máis información a través de calquera das institucións que colaboran na súa organización.