CEL

• 

As instalacións da Fundación CEL - Iniciativas por Lugo acolleron o acto de firma dun convenio de colaboración entre esta entidade e a Asociación de Xoves Empresarios de Lugo (AJE Lugo) a fin de artellar "unha colaboración estable e duradeira" dirixida ao "fomento da cultura emprendedora entre os mozos lucenses" así como á prestación de "apoio aos mozos emprendedores e empresarios da provincia".

A firma deste acordo trata de dar forma á colaboración que de facto vén producindo xa entre ambas as organizacións desde hai tempo e, en especial, nos últimos meses tras o traslado da sede do colectivo ás instalacións do viveiro de empresas da Fundación. A secretaria da Fundación CEL, Lourdes  Pardo Rodríguez, e o presidente de AJE Lugo, Santiago Seijas Alfonso, rubricaron o texto do convenio de colaboración que permitirá "unir esforzos", pondo en común "medios e recursos" a fin de profundizar nunha mellora da coordinación de ámbalas dúas entidades no desenvolvemento de actividades de fomento  da cultura emprendedora ou apoio á creación e consolidación de empresas.

Pardo Rodríguez recalcou na súa intervención esta idea de procura de "optimización de recursos" e aproveitamento de "sinerxias" entre ambas as entidades, que aínda que teñen ámbitos de acción diferentes, comparten "obxectivos comúns". Pola súa banda o presidente de Aje Lugo, Santiago Seijas, fixo fincapé na importancia da devandita colaboración co obxecto de prestar un mellor servizo aos emprendedores lucenses.

O convenio subscrito hoxe implica a integración AJE Lugo no padroado da Fundación CEL - Iniciativas por Lugo e unha maior colaboración de ambas as entidades na organización de actividades conxuntas como a oferta de formación a novos empresarios, a organización dos Premios Anuais da Fundación ou a promoción do asociacionismo empresarial en Lugo como fórmula idónea para o fortalecemento das empresas da provincia.

Internacionalización

Tras o acto de firma do acordo tivo lugar un relatorio a cargo de Daniel Sineiro Rodríguez, Export Sales Manager de Innolact, empresa que deu os seus primeiros pasos nas instalacións do viveiro de empresas da Fundación CEL e que a día de hoxe, e tras só seis anos de actividade, xa exporta ao redor do 30% da súa produción  a vinte e sete países do cinco continentes con gran éxito de penetración dos seus produtos QUESCREM (queixo crema e mascarpone) que se diferencian pola súa calidade fronte a competidores de gran capacidade de produción. Innolact ten presenza en todas as canles de venda do sector: industrial, foodservice e retail.