Escrito o:
WEBINARIOS | Igualdade
A Confederación de Empresarios de Lugo organiza en próximas datas dúas xornadas informativas, en formato webinario, en materia de igualdade. Estruturadas en formato práctico e de curta duración, están pensadas para aclarar de forma directa cuestións relativas á normativa vixente en materia de igualdade e a súa integración na xestión interna das empresas.
Máis concretamente, o vindeiro xoves día 27 de xuño, en horario de 10:00 a 12:00 horas, está previsto o Webinario "Liderando o camiño cara á igualdade no mercado. Rompendo a fenda salarial" e, xa en xullo, o xoves día 11 e no mesmo horario, o Webinario "Como cumprir coa normativa en materia de igualdade? Eliminación da brecha salarial de xénero. Auditoría e plan de igualdade".
Contarase en ambos os webinars coas achegas de Cristina Pérez Vázquez, Licenciada en Psicoloxía, Máster en Prevención de Riscos Laborais, Máster en Dirección e Xestión de Recursos Humanos, Axente de Igualdade de Oportunidades. Cristina Pérez conta con 20 anos de experiencia en área de Recursos Humanos, deles 17 anos dedicada a consultoría para todo tipo de entidades públicas e privadas. Entre os proxectos que desenvolveu ao longo destes anos, destaca a elaboración, asesoramento e negociación de plans de igualdade de oportunidades así como análises de rexistro salarial e auditorias retributivas para empresas de diversos ámbitos e sectores de actividade. Actualmente desenvolve a súa laboura en Grupo Isonor.
Con este tipo de accións divulgativas, que se enmarcan nas actividades do Gabinete Técnico de Igualdade da CEL, complétase a aposta da organización empresarial lucense neste exercicio 2024 por propostas informativas e formativas (como as que está a desenvolver en materia de PRL ou Diálogo Social e Negociación Colectiva) dirixidas a garantir un maior coñecemento e incorporación ás empresas da provincia de Lugo da lexislación vixente en materia de igualdade.
Máis info e inscricións
Para máis información sobre estes webinars, pode descargarse o programa completo de cada un deles en pdf ao final desta entrada. Respecto das prazas, aínda que a asistencia é libre é necesaria inscrición para recibir posteriormente a ligazón de conexion.