CEL

Este domingo, como todos os 28 de abril, celébrase o Día Mundial da Seguridade e Saúde no Traballo, unha data conmemorativa que a Organización Internacional do Traballo (OIT) aproveita anualmente para impulsar campañas de sensibilización e concienciación dirixidas a centrar a atención internacional sobre a magnitude do problema dos riscos laborais e sobre como a creación e promoción dunha cultura da seguridade e a saúde pode axudar a reducir o número de mortes e lesións relacionadas co traballo. 

 

Este ano a campaña do Día Mundial da Seguridade e Saúde no Traballo incide no impacto do cambio climático na seguridade e a saúde laboral. Asi, a OIT sinala que o cambio climático repercute na saúde das persoas e o planeta e destaca que "ten graves efectos sobre a seguridade e a saúde dos traballadores, que a cotío son os primeiros en estar expostos a estes perigos, a miúdo durante períodos máis longos e con maior intensidade que a poboación en xeral". Subliña que os traballadores se enfrontan a riscos laborais exacerbados polos patróns cambiantes do clima como a calor excesiva, a radiación ultravioleta, os fenómenos meteorolóxicos extremos, a contaminación do aire no lugar de traballo, as enfermidades transmitidas por vectores e os cambios no uso de produtos agroquímicos, entre outros. Moitos problemas de saúde están relacionados co cambio climático, como o cancro, as enfermidades cardiovasculares e respiratorias, e os trastornos mentais".

 

Respecto diso, subliña que é necesario "promover, respectar e facer realidade o principio fundamental e o dereito a unha contorna laboral seguro e saudable no traballo tamén implica, entón, abordar os efectos nocivos do cambio climático no lugar de traballo" e que é "crucial incorporar a seguridade e a saúde no traballo (SST) ás políticas climáticas e, así mesmo, integrar as cuestións climáticas nas prácticas de SST. A lexislación pode necesitar unha reavaliación ou novas normativas a medida que cambian estes riscos climáticos".

 

Por outra banda, desde a CEL organizamos este luns o webinar "Repercusións do cambio climático na seguridade e saúde no traballo", que terá lugar a partir das 10:00 horas e que poderá seguirse a través desta ligazón.