Escrito o:
CEL e Iberdrola subscriben un acordo de subministración de enerxía con servizos e descontos para as empresas de Lugo
A Confederación de Empresarios de Lugo (CEL) e Iberdrola veñen de asinar un convenio marco polo que a empresa de enerxía ofrecerá ás empresas asociadas á CEL condicións preferentes de subministración de enerxía así como outros produtos e servizos relacionados coa eficiencia enerxética.
Borja Cancela, director comercial de Iberdrola para Galicia e Asturias, e Jaime López, secretario xeral da CEL, rubricaron o acordo nun acto que tivo lugar nas instalacións da organización empresarial lucense.
A través desta colaboración, Iberdrola busca proporcionar "un tratamento diferencial para os asociados da CEL, conforme á situación dos mercados enerxéticos, optimizando as actuacións respecto da regulación actual e ás características específicas de consumo de cada un deles".
Nesta liña, facilitará "condicións competitivas de contratación de enerxía eléctrica e outros produtos e servizos", servizos de "análise dos contratos de electricidade para a súa optimización" e diferentes descontos en subministracións eléctricas de gas en baixa tensión e presión específicos para as empresas da CEL.
Igualmente, en virtude do convenio, Iberdrola ofertará ás empresas lucenses interesadas servizos como Smart Solar, Smart Mobility, Smart Home, Cota Fixa, Factura Electrónica, Protección Eléctrica do Fogar, Servizo de Urxencias Eléctricas, Pack de Mantemento Gas ou Servizo de Orientación Xurídica, entre outros.
Iberdrola comprométese, ademais, a proporcionar "Enerxía Verde", procedente de fontes renovables.