CEL

O secretario da CEL, Jaime López e o presidente da Federación de Veciños, Jesús Vázquez, mantiveron recentemente unha reunión na que buscaban intercambiar opinións sobre a situación da cidade e a provincia e axuntar esforzos na posta en marcha de accións que poidan reverter no interese xeral da contorna no que desenvolven a súa actividade.

As constantes noticias sobre o adianto do peche da central térmica das Pontes e o posible peche da factoría de Alcoa en San Cibrao, que manteñen en albas a toda a provincia, marcaron un encontro no que se recuperou unha xa vella demanda da CEL: que Lugo necesita xestionar directamente os fondos que xera a actividade dos seus portos a través dunha Autoridade Portuaria propia.

A principal preocupación do encontro foi, no entanto, o efecto que pode ter para a provincia de Lugo o fin da actividade das factorías das Pontes e Alcoa. Ambas as entidades lembran que unha alta porcentaxe de traballadores das Pontes procede de Lugo e que, pola súa banda, Alcoa foi durante as últimas décadas uno dos principais motores económicos do norte provincial; a desaparición de calquera destas factorías xerará, sen dúbida, un problema económico e social de consecuencias moi graves para a provincia.

En relación co anterior, CEL e Federación de Veciños coinciden na necesidade de que todas as forzas políticas e sociais sómense para buscar solucións de futuro para ambas as factorías. Sinalan que Lugo é xa practicamente un "páramo industrial" e que "calquera perda dunha empresa implica agudizar o abandono e o despoboamento dunha provincia que necesita precisamente o contrario, que se invista decidido e continuadamente nela".

Neste sentido, cren que resultaría útil a "inmediata constitución" da tan ansiada Autoridade Portuaria de Lugo, a fin de "investir dunha vez por todas a riqueza que xeran os portos da provincia nos portos da provincia, garantindo que os lucenses poidan exercer o seu dereito a xestionar a súa actividade portuaria, do mesmo xeito que sucede no resto das provincias españolas".

A CEL lembra que a Autoridade Portuaria de Ferrol - San Cibrao, que xestiona os peiraos lucenses desde 1993, recada de taxas portuarias nestes máis de tres millóns de euros anuais, dos cales non consta que se invista nin un 0,7% nos portos da provincia.

Por outra banda, a Federación de Veciños tamén coincide coa CEL en que sería importante lograr a liberalización do dique norte de San Cibrao antes de que finalice a concesión (outorgada até 2023), abríndoo ao tráfico xeral, co efecto dinamizador que tería de forma inmediata para a economía mariñá e sen interferir na actividade de Alcoa, que se concentra no dique sur.

CEL e Federación realizarán a partir de agora unha serie de accións para mobilizar á sociedade lucense en favor da Autoridade Portuaria provincial, como o envío de cartas a entidades sociais e responsables políticos ou a convocatoria de reunións técnicas con empresas da zona, entre outras.