CEL

• 

O presidente de AJE Lugo, Mauricio Repetto e o secrtario da Confederación de Empresarios de Lugo (CEL), Jaime López, presentaron hoxe na sede central da CEL, o I Torneo de Pádel para empresas da provincia de Lugo, que terá lugar ao longo de toda a xornada do sábado 25 de marzo nas instalacións do centro deportivo D10, situado en Outerio de Rei e cuxo xerente, Pablo Real, participou tamén no acto de presentación de hoxe.

O obxectivo deste encontro, impulsado por AJE Lugo como evento de networking a partir do deporte, é o de "fortalecer desde o deporte a comunicación entre novos empresarios e outros máis consolidados", en palabras de Mauricio Repetto.

O presidente e AJE Lugo destacou tamén que "o deporte une" e é unha boa "escusa" para facilitar o establecemento de novas relacións ou fortalecer as xa existentes, "xerando novas oportunidades comerciais e de negocio" e subliñou que este Torneo de Pádel é unha primeira iniciativa destas características que esperan repetir con outras actividades deportivas.

Pola súa banda Jaime López, secretario da CEL, subliñou que "a relación entre deporte e empresa sempre dá bos resultados" pois permite a creación de redes de contacto valiosas "fóra da contorna habitual". Destacou ademais, que este torneo é unha "experiencia piloto" a través dun deporte dinámico e accesible como o pádel, que esperan replicar con outras "entidades deportivas e sociais", e un "símbolo" da boa sintonía existente entre a CEL e AJE Lugo.

Inscricións

A inscrición no torneo, que se desenvolverá de 9:00 a 21:00 horas e inclúe almorzo, comida e cóctel final, é gratuíta ata completar o número máximo de parellas participantes (32), aínda que está o torneo aberto a calquera persoa que, aínda que non vaia a competir, teña interese en relacionarse con outros empresarios nun ámbito máis informal e distendido.

Para tramitar a inscrición, hai que contactar con D10 no número de teléfono 982 986 035, ou no mail torneos@sportd10.com.