Escrito o:
Os instaladores fórmanse en asesoría para aforro enerxético
A Asociación de Instaladores Electricistas e de Telecomunicacións da Provincia de Lugo (APIEL), iniciou hoxe un curso intensivo de axentes enerxéticos, que facilitará aos instaladores asociados a esta organización empresarial formación especializada en asesoramento enerxético integral ao cliente, dirixido a procurarlle solucións orientadas a un maior aforro no seu consumo eléctrico.
O curso, que terá lugar nas instalacións da sede central da Confederación de Empresarios de Lugo (CEL) os días 12, 19 e 20 de setembro en horario de 9:00 a 14:00 horas e de 16:00 a 20:30 horas, está dirixido por formadores de Fenie Energía, entidade comercializadora posta en marcha pola Federación Nacional de Empresarios de Instalaciones Eléctricas y de Telecomunicaciones con motivo da liberalización do sector enerxético.
Fenie Energía, que á data actual conta con máis de 1.600 axentes enerxéticos e 150.000 clientes, ofrece, ademais da venda de enerxía, asesoramento enerxético implementado a través dos seus Servizos de Aforro Enerxético (SAEs). Entre os instrumentos para o aforro que utiliza atópanse: optimización do contrato eléctrico (optimización da potencia contratada); detección de ineficiencias enerxéticas nas instalacións a través de medidores intelixentes; deseño, instalación e seguimento de solucións para aforro enerxético.